كيف كشفت كواليس دويتو تامر حسني ورامي صبري المنتظر عن صداقتهما الممتدة من الطفولة؟

تامر حسني ورامي صبري يجهزان لأول دويتو غنائي بينهما بعنوان "فعلاً مبيتنسيش"، وشوقا الجمهور في الفترة الأخيرة للدويتو بنشر عدة كواليس من كليب الأغنية، وهي التي كشفت عن عمق الصداقة القوية بين تامر حسني ورامي صبري.

رامي صبري يكشف كواليس دويتو "فعلاً مبيتنسيش" مع تامر حسني

وتداول الجمهور مؤخراً عدة صور وفيديوهات من كواليس دويتو "فعلاً مبيتنسيش"، والتي جمعت تامر حسني مع رامي صبري، وكشفت عن عدة لقطات لاقت إعجاب الجمهور، ومنها صورة ظهر بها تامر حسني وهو يمسك الميكروفون لرامي صبري أثناء غناء الأخير، وهو ما اعتبره الجمهور دليلاً على تواضع تامر حسني ومحبته لزميله رامي صبري، وأشادوا بهذه الروح الطيبة التي تجمع النجمين رغم المنافسة بينهما.

وعلق رامي صبري على هذه الصورة، وكشف شهادته عن العمل والتعاون مع تامر حسني وقال في رسالة له: "أنا بشوف الصورة دي بشكل تاني خالص، أولاً تامر فنان أخ وغالي ومحترم وواثق في نفسه، ودي للاسف مش موجودة كتير فى مغنيين كتير ناجحين ولكن عندهم مشاكل كبيرة ومايعرفوش يبقوا زي الراجل المحترم اللي ماسك المايك ده، تامر حسني فنان كبير جداً جداً ولما اشتغلت أنا وهو في الديو اللي هاينزل الفترة اللي جاية فهمت هو ليه محبوب جداً".

تامر حسني يكشف تاريخ صداقته مع رامي صبري

وأضاف رامي صبري في رسالته إلى تامر حسني: "أولاً علشان عنده صفاء نفسي مش موجود عندي أنا شخصياً، اه والله أنا دايماً ليا رد فعل انما هو بيسيب الحاجات زي ماهي وما بيحبش يرد ودي حاجة صعبة جداً جداً، عاوز أقول مش كل فنان أو نجم يستحق.. لان دايما الأخلاق واحترام زمايلك هو الموضوع مش بس الفن، شكراً تامر حسني على ذوقك واحترامك ليا دايما في التصوير ودايما كنت تقولي انت مبسوط ايه رايك محتاج حاجه؟ كل ده ماينفعش يطلع غير من فنان حقيقي عنده احساس بالناس والأهم واثق من نفسه.. قريباً جداً هتشوفوا وهاتسمعوا أغنية (فعلاً مبيتنسيش)، على جميع منصات الموسيقى في العالم".

ورد تامر حسني على رسالة رامي صبري في رسالة أخرى عبر حسابه بفيسبوك، وكشف في رده عن صداقته القديمة مع رامي صبري والممتدة منذ الطفولة، وقال: "حبيبي يا رامي إنت قبل ما تكون نجم كبير ومُهم إنت صاحبي من أيام الطفولة، ودي حاجات الناس متعرفهاش ويمكن مكنش في فُرصة نحكي ده قبل كده.. إنت يا رامي صاحب عُمر ومشوار مشيناه من الطفولة وأنا في الصورة ماسك المايك لأخويا ولصوت مصري عظيم يستحق، شُكراً يا حبيبي على كلامك الغالي اللي من القلب أنا  فعلاً اشتغلت معاك من كل قلبي وبكُل حرص علينا إحنا الاتنين بكُل التفاصيل بدافع الحُب والصداقة وإن ربنا يكرمنا مع بعض".

وكشف تامر حسني الهدف من وراء الدويتو وقال: "أعتقد إن التعاون ده هيحمس كُل جيلنا إنه يعمل أفكار مشاركة كده وأنا بنادي بيها من زمان من أيام تامر وشيرين وبعدها تامر  بهاء في أغنية قوم اقف، وأنا وإنت، بعدها اتكلمنا من سنين عشان نجمع البعض من جيلنا وعملنا المستحيل وللأسف معرفناش فقولنا نبدأ بنفسنا عشان نحمس الكُل، حقيقي جمهورنا يستاهل مننا كُل الجديد وكل المُفاجآت اللي تفرحه والمطربين اللي هييجوا بعدنا يستحقوا إنهم يتعلموا ده مننا عشان يكملوه للي بعدهم إنتظروا كليب فعلاً مبيتنسيش بيني وبين أخويا النجم الكبير رامي صبري باشا".

تامر حسني ورامي صبري يشوقان الجمهور لأغنيتهما الجديدة

وكان الفنان تامر حسني قد نشر صورة له مع رامي صبري في شهر مايو الماضي في الاستديو، وكشف وقتها لأول مرة عن الدويتو الجديد بينهما، بالإضافة إلى كشفه عن الصداقة العائلية التي تجمعه مع رامي صبري، حيث ظهر مع بسمة بوسيل وزوجة رامي صبري أيضاً في الصورة، وعلق وقتها: "صداقة عمر يمكن مكانتش باينه، بس رمضان كريم ودايماً بييجي بمشاعره الطيبة وان شاء الله الصداقة دي مكملة طول العمر واستنوا حاجة حلوة مننا ان شاء الله تليق بيكم.. رمضان كريم".

ومن المتوقع أن يطرح تامر حسني ورامي صبري الدويتو الجديد في بداية 2025، وفي الوقت نفسه يستعد رامي صبري لإحياء أول حفل 2025 مع نانسي عجرم، وشوق الجمهور للحفل قائلاً: "جمهوري الغالي في السعودية مستنيكم يوم ٣ يناير في ليلة كلها طرب وحماس مع صديقتي النجمة الكبيرة القمر نانسي عجرم، على مسرح أبو بكر سالم، تطرح التذاكر يوم ٢٧ ديسمبر الساعة ٩ مساءً"، في حين ينتظر تامر حسني في 2025 العديد من الخطوات الفنية الجديدة وعلى رأسها فيلم "ريستارت" في عيد الفطر المقبل.

الصور من حساب رامي صبري وتامر حسني على انستقرام.