إيناس عزالدين غاضبة: لن أدخل التلفزيون المصري طالما....؟

 

إيناس وجهت لعبد السلام رسالة قاسية باللهجة المصرية نشرتها عبر صفحتها على موقع "انستغرام" أوضحت فيها أسباب غضبها من الفضائية المصرية قائلة: "أنا إمبارح سجلت حلقة في التلفزيون المصري تقديرا لصديقتي الجميلة والحبيبة مروة ناجي، ولكن باستثناء الحلقة دي أعلن اﻵتي: لن أدخل بوابة التلفزيون المصري طول ما اﻷستاذ محمود عبد السلام هو رئيس الفضائية المصرية".

 

وأضافت: "لما رئيس الفضائية المصرية يكون غير مقدّر للفن والفنانين المحترمين، ويقول إن الفضائية المصرية مش قناة فنية، ويتريق على صوت فلانة وشكل فلانة وجسم فلانة ولبس فلانة، ولما الموضوع يوصل لحد عندي ويقول دي تخينة وصوتها وحش مين دي أصلا وتتكلم بصفتها إيه، يبقى لأ بقى هيكون لي وقفة كبيرة وكل ده علشان أنا كلمته واعترضت وطالبت بعرض حلقتي كاملة بعد ما تم تشويهها بإذن منه، ونزلها غير كاملة بدون إذن من مخرجة البرنامج أو فريق البرنامج وعرضها أقل من نصها وشوه مضمون الحلقة تمامًا".

 

وتابعت ايناس: "ده شيء مسيء ليا بعد كل المجهود اللي عملته، ولما كلمته واعترضت وقولتله أنا هنوه عن اللي حصل مع كل الصحفيين وصلني أنه قال لفريق البرنامج علشان يوصلولي التهديد إنه مش هيدخلني التلفزيون المصري في نفس الوقت اللي أنا كنت بصور فيه حلقتي إمبارح مع صديقتي الفنانة الجميلة مروة ناجي، طبعا هو بيستغل إن فيه فنانين مصريين كتير مش واخدين حظهم للأسف وبيدوروا على أي فرصة يظهروا بيها فمش فارق معاهم تطلع شكل الحلقة إيه وبيتنازلوا عن حاجات كتير ﻷنهم بيحلموا بس بالظهور في التلفزيون وهو يتريق عليهم ويهين فيهم والكلام ده بيحصل قدام فريق العمل، وده ظلم وإهانة للمواهب المصرية اللي هي أكبر وأهم من أنها تطلع في برنامج في القناة اللي هو فاكرها بتاعته لكن المرة دي حظه وقع معايا أنا..".

 

وختمت رسالتها قائلة: "أنا الحمد لله مش مستنية حلقة في التلفزيون المصري اللي مش بيقدر مواهب وطنه علشان أطلع فيها، والحمد لله بطلع في كل القنوات وفي أي وقت وفي أي مكان وليا أجر محترم وأنا لو طلعت على القناة اللي هو فاكرها بتاعته فأنا طلعت مش علشان اتشهر لأن الحمد لله معروف كويس أنا مين..أنا طلعت بدون أجر وبدون شروط وبدون طلبات فقط احتراما لتلفزيون وطني..من غير كلام عمري ما هدخل التليفزيون المصري طول ما هو فيه.. رسالة للأستاذ محمود عبد السلام رئيس الفضائية المصرية.. أنا إيناس عز الدين وكفى".