خطيبة الراحل هيثم أحمد زكي توجه رسالة لمن تغيرت حياتهم بعد وفاته

لازالت الصدمة تحيط بإنجي سلامة خطيبة الفنان الراحل هيثم أحمد زكي، حيث قررت مشاركة متابعيها وأصدقائها على موقع فيسبوك، بمشاعرها وحالتها التي تأثرت بوفاة خطيبها، حيث كتبت تدوينة طويلة، نصحت من خلالها البعض ممن يتعرضون لاختبارات صعبة، كيف يتعاملون معها.

خطيبة هيثم أحمد زكي تتحدث عن حالتها بعد وفاته

وكتبت إنجي سلامة: "أنا بكتب الكلام ده وأنا مش قادرة اكتب حاجة بس قلت ممكن يكون فيه أي حاجة تفيد أي شخص تكون في ميزان حسنات هيثم وأنا بفكر نفسي قبلكم والله.. كلنا بيعدي علينا اختبارات في حياتنا وممكن نحس انه اختبار كبير أوي وصعب بس ربنا قال: (الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون).. يعني أنا كلي لله وراجعة له علشان الواحد يفتكر إنه في الأخر ملوش غير ربنا وكلنا في الأخر راجعين له مهما قلوبنا تعلقت بأشخاص او أشياء".

وأضافت: "سيدنا يعقوب لما قالوا له إن ابنه سيدنا يوسف توفي قال: (فصبر جميل والله المستعان على ما تصفون) الصبر الجميل مش معناه إن مفيش حزن هو كان حزين جدا على يوسف واخوه.. بس يكون فيه رضا.. في ناس وقت البلاء ممكن تقول ليه يا رب عملت فيا كده أو اشمعنى أنا ويقول أنا صابر بس ده مش معنى الصبر اني اكون معترضة على قضاء الله".

نصيحة إنجي سلامة لجمهور خطيبها الراحل

ونصحت إنجي سلامة، خطيبة الفنان الراحل هيثم أحمد زكي، متابعيها ومحبو الفنان الشاب، وقالت: "دايما خلي شكوتك لله واتكلم معاه من قلبك ربنا سميع قريب ودود مجيب زي ما سيدنا يعقوب قال كمان (إنما أشكوا بثي وحزني الى الله وأعلم من الله ما لا تعلمون).. أي ابتلاء انت بتعدي بيه دلوقتي ليه اخر وليه جزاء وهتشوف جزاء الصبر ده في الدنيا والآخره بس خليك راضي بقضاء الله، ربنا قال: (سيجعل الله بعد عسر يسرا) ده وعد".

وتابعت: "الصبر معناه اني راضية وعارفة ان في جزاء كبير أوي وفي خير (إنما يوفى الصابرون أجرهم بغير حساب) (والصابرين في البأساء والضراء وحين البأس أولئك الذين صدقوا وأولئك هم المتقون).. وقت البلاء ممكن تلاقي ناس كتير حواليك ربنا بعتهم لك يهونوا عليك لكن مفيش حد في ايده حاجة بجد غير الله وماحدش هيبقى حاسس بوجعك غيره (ليس لها من دون الله كاشفة) (أمن يجيب المضطر اذا دعاه ويكشف السوء)".

وأكدت أن الله أعلم بالخير لكل شخص، وأنه مع البلاء، يُنزل الله لطف وصبر يجعل الشخص يتعرف على الله على بشكل، وتابعت: "يمكن ربنا مايجمعكش باللي بتحبه في الدنيا لحكمة هو يعلمها وهو العليم الحكيم لكن يجمعنا بيهم في الجنة في الحياة الحقيقية اللي مافيهاش ولا حزن ولا تعب ولا مرض ولا فراق.. أي حد فقد شخص عزيز خليك عارف إن مش دي النهاية هو بس انتقل قبلك بشوية لحد ما انت كمان تخلص رسالتك في الأرض ومهما طال الوقت فهو برضه قصير في الأخر هنقول ده أكنه كان يوم أو أقل كمان".

إنجي سلامة توجه رسالة لهؤلاء

ووجهت إنجي سلامة رسالة إلى أي شخص تغيرت حياته بعد وفاة هيثم، وقالت: "أي حد اتغير بسبب هيثم أو أثر فيه يا ريت ياخد نية إن أي عمل خير بيعمله أو تغيير، يكون في ميزان حسنات هيثم وادعوا له دايما ويارب يجمعنا بكل أحبابنا في الفردوس الأعلى بدون سابقة عذاب ولا عتاب ولا حساب".

وكان هيثم أحمد زكي توفى قبل أسبوع تقريبًا، عن عمر ناهز 35 عامًا، بعد إصابته بهبوط حاد في الدورة الدموية، وحرص عدد كبير من النجوم على نعيه وحضور جنازته وعزائه، وسط حالة من الحزن الشديد على فراقه وعلى معاناته.