رحمة أحمد فرج بطلة "الكبير أوي 6" تعلق على مقارنتها بـ دنيا سمير غانم وهكذا دعمها نجوم الفن

رحمة أحمد فرج الفنانة الصاعدة التي لعبت دور مربوحة في مسلسل "الكبير أوي 6" تصدرت الترند خلال اليومين الماضيين تزامنًا مع أول ظهور لها بالعمل، حيث باتت حديث الجمهور بسبب أدائها اللافت واعتبرها الجمهور أنها سوف تحقق مكانة كبيرة في مجال التمثيل، فيما حرص البعض على مقارنة دورها بالعمل، بدور هدية الذي قدمته النجمة دنيا سمير غانم في الأجزاء الأربعة الأولى.

رحمة أحمد فرج تعلق على مقارنتها بـ دنيا سمير غانم

من جانبها قررت رحمة أحمد فرج التعليق على ردود الأفعال الإيجابية التي تزامنت مع ظهورها بالعمل، كما علقت على المقارنة بينها وبين دنيا سمير غانم، وكتبت في تدوينة عبر فيسبوك: "أنا مش عارفة أعبر عن احساسي بالامتنان.. الحمد لله والشكر لله.. أي حاجة حلوة حصلت أو اتقالت لي ده كرم كبير أوي من ربنا يمكن أكبر من اللي استحقه.. عاوزة اقول ٣ نقط".

وأضافت رحمة أحمد وتحدثت عن مقارنتها بدنيا سمير غانم وأكدت أن تلك المقارنة ليست في صالحها، وتابعت: "الأولي وهفضل أقول البوقين دول كل ما حد يشاور النقطة دي إن فنانة زي دنيا سمير غانم لا تقارن بأحد.. أنا مش حد خالص.. أنا من فانز دنيا سمير غانم.. لأن لو اتحطينا في مقارنة من المؤكد اني انا اللي هبقى خسرانة".

رحمة أحمد فرج تشيد بتعاونها مع أحمد الجندي وأحمد مكي

رحمة أحمد فرج أشادت كذلك بتجربتها مع مخرج العمل أحمد الجندي ونجم العمل أحمد مكي، وكتبت عنهما: "الثانية، بعد توفيق ربنا.. إن فنان زي أحمد مكي يدي مساحة لحد يقول حاجة، دي مابتحصلش من أي فنان موجود على الساحة.. الراجل ده عنده اللي يكفيه وزيادة إنه يسيب فنان قدامه يقول وهو سايب إيده.. مهما اتكلمت عنه مش هوفيه حقه فنيا ولا إنسانيا.. المبدع أحمد الجندي مايتخيرش عن مكي.. يسيبك تقول.. ويعليك.. ويركب لك شغل.. وذكي يعرف يطلع ضحك من أي شخصية ويحطها في مكانها الصح".

رسالة مميزة من بطلة "الكبير أوي 6" لـ أحمد أمين

فيما وجهت رسالة للنجم أحمد أمين باعتباره هو من قدمها في برنامجه الكوميدي "أمين وشركاه" وقالت له: "الثالثة ليك انت يا حبيب قلبي.. اخويا الكبير الداعم المستمر بكل الطرق.. صادق في فرحته.. أنا مهما حكيت على اللي عملته معايا عشان أوصل اني ابقى في عمل من أهم الأعمال في رمضان مش هكفي فيك كلام.. شكرا أحمد أمين الأخ والفنان والإنسان انك دايما جنبي.. أحمد أمين، أحمد مكي.. أحمد الجندي.. انتو مكسب لأي فنان ولأي شخص وبشكر ربنا دايما ان ربنا كتبلي اني اعرفكم.. وشكرا لأي حد دعمني حتى لو بكلمة كويسة وبالأخص صلاح الدالي.. فنان هياخد حقه كويس جدا ويستاهل اكتر بحبك يا صلوحة.. شكرا لأي حد وقف جنبي واللي اداني ضهره وربنا لأوريك".

النجوم يدعمون رحمة أحمد فرج صاحبة شخصية "مربوحة"

ودعم عدد من النجوم الفنانة الشابة بعد تألقها في أول أدوارها، ومن بين هؤلاء النجم أحمد مكي الذي أعاد نشر عدد من مشاهدها بالحلقة الماضية من المسلسل، عبر حساباته على مواقع التواصل الاجتماعي، أما الفنان أحمد أمين فقد تفاعل كذلك وأعاد نشر عدد من التغريدات التي تشيد بأداء رحمة، فيما علق على تغريدة أخرى تؤكد أنه هو من قام باكتشاف الفنانة الشابة في أحد برامجه وقال: "هي اللي اكتشفتني".

هي اللي اكتشفتني 😊 https://t.co/IphScyjrIC

— Ahmed Amin (@AhmedAmin) April 6, 2022

فيما علق الإعلامي عمرو أديب على دورها وكتب عبر تويتر: "مربوحه اديتنا كلنا درس مهم: مفيش حد لا يعوض مفيش حد لا يستبدل ولو انت موهوب ومجتهد تاخد قلب العالم كله.. واخيرا بلاش نتوقع فشل حد قبل ما يقدم اللى عنده كله".

#مربوحه اديتنا كلنا درس مهم : مفيش حد لا يعوض مفيش حد لا يستبدل ولو انت موهوب ومجتهد تاخد قلب العالم كله . واخيرا بلاش نتوقع فشل حد قبل ما يقدم اللى عنده كله .

— Amr Adib (@Amradib) April 6, 2022

الصور من حساب رحمة أحمد فرج بفيسبوك ودنيا سمير غانم بانستجرام.