مخرج مسلسل "كلبش 2" يرد على انتقادات الجمهور ويعتذر عن الأخطاء

بعد تعرض مسلسل "كلبش" الجزء الثاني لعدد من انتقادات الجمهور عبر السوشيال ميديا، خرج مخرج العمل بيتر ميمي عن صمته وقرر الرد توضيح بعض النقاط التي أثارت الجدل والانتقادات التي طالت الحلقات الأولى للمسلسل المعروض حاليا في موسم رمضان 2018.

مخرج مسلسل كلبش يرد على الانتقادات

وكتب مخرج مسلسل "كلبش 2" تدوينة طويلة عبر حسابه على الفيسبوك جاء فيها :" ": "انا عادة مش برد على تعليقات لكن بقراها و باخدها باهتمام للتطور و فعلا الحمدلله و بفضله التطور موجود من عمل لاخر و من سنة لاخرى لكن حبيت ارد على بعض التعليقات لان فعلا نسبة مشاهدة كلبش اصبحت فوق المتوقع لدرجة اكبر بكتير كمان من رمضان السابق".

وبالنسبة الى انتقاد اختلاف اللهجات بين أفراد العائلة الواحدة، أوضح قائلا: "عاكف ابو العز بيتحدث بلهجة صعيدية و ابوه بلهجة بدوية و ده باين من اول حلقة (متبقاش صعيدى زى اللى خلفتك) و هنعرف مين اللى خلفته و ليه مش ابوه اللى رباه حلقة ١٥ و معانا مصحح لهجة بدوي و مصحح لهجة صعيدى للدقة".

وحول السخرية من من ظهور ضابط الامن في المسلسل بالذقن الكثيف، قال: "ضابط الامن الوطني ممكن يكون بدقن و شعر طويل عادى جدا و انا راجعت ده بنفسى قبل التصوير من بعض الضباط و قيادات الداخلية و احنا بناخد التصاريح للتصوير فى اماكن حقيقية و حية مثل سجن طرة و مستشفى الشرطة".

وتابع: "وضعية مسك الالي ممكن تكون من الماسورة و اثناء الاشتباك ممكن تكون من الخزنة لسرعة تغيير الخزنة و كان معانا عميد من العمليات الخاصة اثناء تصوير المشاهد ديه و الراجل كان بيدى المحاضرة ديه قدامى للضباط مع العلم ان المدرعات و المركبات و الجنود و الضباط هم حقيقيين من العمليات الخاصة".

بيتر ميمي يعتذر عن الاخطاء

وقدم مخرج "كلبش 2" اعتذارا عن احد الاخطاء التي وردت في العمل، وقال: "تراك جيم او ثرونس اللي في اول حلقة ده غلطة غير مقصودة لان احنا فى المونتاج بنحط تراكات عالمية و بعدين بنشيلها فى الميكساج ده بيحصل فى كل الشغل و الحلقة الاولى كان فيها ١٣ تراك من جيم اوف ثرونس تم تغييرهم بموسيقى المسلسل و نسيو واحد سهوا ، و بعتذر على الخطأ الغير مقصود برده لانى طلبت تغييرات فى الحلقة اكتر من مرة كل شوية بعدل فيها و احنا عاملين موسيقى للمسلسل مصر كلها عارفاها من السنة اللى فاتت".

واختتم: "ابن سليم الانصاري بيرضع كراوية مع انه المفروض بيرضع ريد بو ل عادي.. حلقة ٨ انا عيدت المشهد لما روچينا قالت (عمر) بدل (حسام) سهوا و المونتير من ضيق الوقت حط الشوت الغلط سهو".

ووجه شكرا لكل الجمهور قائلا :"انا بشكر الناس اللى متابعة المسلسل بدقة شديدة و بشكر فريق العمل (النجوم - الانتاج - المونتاج - التاليف - الميكساج - الموسيقى- الديكور - مساعدين الاخراج) علشان احنا بسببكم بنافس على اعلى مشاهدة للسنة التانية على التوالى بجزء تانى و ده مبيحصلش".

أعلن بيتر ميمي عن تحضيره لمسلسل ضخم لموسم رمضان 2019 قائلا :" (كلبش٢) بما فيه من اكشن و ضخامة انتاجية هيكون ولا حاجة بالنسبة للمشروع اللى تم تحديده للعام المقبل رمضان ٢٠١٩ و اللى هيكون الاضخم عربيا و بيضم مجموعة من نجوم عالميين من انتاج شركة سينيرجى ان شاءلله، ادعولنا بقى احنا بنحاول نطور الصناعة و انتظرو حرب كرموز في مصر و الخليج و اوروبا (ايطاليا - المانيا- لندن)".