تطورات الحالة الصحية لـ أحمد أمين بعد إصابته بمرض في الحنجرة

أقلق الفنان الكوميدي أحمد أمين الجمهور على حالته الصحية بعد اعلانه مؤخرا عن اصابته بمرض في الحنجرة وفقدانه لصوته، الا انه طمأن كل محبيه في الساعات الماضية عن تحسن حالته وتجاوبه مع العلاج من خلال تدوينة سرد فيها ايضا كيفية تعامله مع هذه التجربة المرضية الصعبة.

تجربة مرض احمد أمين

وكتب في تدوينة له عبر حساباته على السوشيال ميديا: "أنا الحمد لله بقيت أحسن كتير.. وهارجع اشتغل قريب جدا.. وباخد دلوقتى جلسات voice therapy دى حاجة لطيفة جدا واكتشفت إنها ضرورية ومفيدة لكل اللى بيستخدم صوته كتير (ممثل – مغنى – مدرس)".

وتحدث احمد أمين عن تجربته بالتعامل مع المرض قائلا: "استفدت كتير جدا من تجربة الصمت.. أسبوعين من غير كلام فرقوا معايا جدا ذهنياً.. وينفع يتكتب فيها كتب بس سريعا كدة.. أولا لقيت نفسى عايز اكتب زى زمان.. مش عشان عندى كبت.. لأ.. عشان المخزون بيزيد.. ما هو لما بتقلل وقت الإرسال وقت الاستقبال بيزيد.. أنا بقيت بسمع.. قريت كتير.. قريت حتى حاجات متعلقة عالحيطة فى المكتب والبيت من زمان قدام عينى وماكنتش قريتها.. وتقريبا قربت اسمع الحاجات كمان.. قربت اسمع الزرعة اللي عندي فى المطبخ".

 وتابع:  كنت بتواصل مع الناس بالكتابة واحتفظت بشوية ورق منه لقيت الكلام ورا بعضه فى سياق مسخرة مش مفهوم بالمرة.. أما الورقة اللى كنت بكلم فيها مراتى لقيت فيها 3 جمل بس.. (ياااه...؟ / ما هى غلسة وتستاهل/ وحاضر يا حبيبتي) بس .. وبيتكرروا..كنت بشاور لأولادي.. وفهموني.. وما اضطريتش ازعق فى البيت.. والدنيا كانت ماشية.. معناه ان لو القانون ان بابا مش بيزعق هايترتب على القانون ده ان كلنا هانسمع الكلام منغير زعيق".

احمد امين يستفيد من تجربة مرضه

 احمد أمين استكشف في فترة مرضه ايجابيات التعامل بطريقة أخرى مع الأشخاص بدون كلام، قائلا : "الصمت محتاج صبر.. وعدم التعبير بالكلام محتاج بلاغة.. مش فى إنك تعرف تشاور.. لأ.. محتاج بلاغة فى اختيار الكلمة اللى هاتشاور بيها عشان تلخص كل كلامك والناس تفهم.. من العجائب مثلا انى أنا طلبت الأوردر فى الكافيه بالإشارة وجه مظبوط.. فيه بلاغة تانية فى الاستماع.. أنت ممكن تقول رأيك بتعبيرك وانت بتسمع.. ممكن تعطل أفكار اللى قدامك.. ممكن تشجعه.. وممكن توصل حاجات كتير بطريقة استماعك بس".

وأضاق "اتفاجئت من الحاجات المشتركة بينى وبين ولادى وصحابى القريبين.. كانوا بيفهمونى بأقل الإشارات.. واتفاجئت إن ولادى مبسوطين جدا انى بسمعهم بس.. من غير ما اقول حاجة.. فقررت إنى لازم اقضى وقت طويل بس بسمعهم.. اكتشفت انهم بس محتاجين كده.. مش عايزين معلوماتى العبقرية.. ولا آرائى فى الحياة.. ولا حلولى الابداعية.. عايزيننى مهتم.. بس.. ومن ألطف الحاجات انى لما كنت بشاور للناس كانت بتشاور لى حتى اصحابى اللى عارفين الموضوع.. حضرتك أنا بسمع.. أنا عندى مشكلة فى صوتى بس".

 واختتم تدوينته بتوجيه نصائح للجميع قائلا: "من مصلحة أى انسان انه يسكت لأن التعبير المستمر السريع الغير محسوب عن أفكارك بيخليك مش لاحق تكون رأى متكامل وناضج.. أنا كنت بسمع حاجة وبسكت بلاقى رأيى بيتحسن تدريجيا.. وفى معظم الأحوال كنت بحس ان رأيى مالوش لازمة أوي.. بقول لك ايه.. اسكت أحسن".

 وسبق وأن اعلن أحمد أمين عن إصابته بمرض فى الحنجرة ما اضطره الى فقدان صوته لفترة ثلاثة أسابيع.