الفنان شريف إدريس في رسالة حزينة بعد اضطراره اعتزال الفن: "تعرضت لمواقف مهينة ومحتاج فلوس"

شريف إدريس الفنان المصري وأحد أبرز المواهب التي ظهرت أثناء طفولتها في مجموعة كبيرة من الأعمال السينمائية والدرامية مع كبار النجوم، قرر اعتزال العمل الفني بعد مسيرة استمرت لأكثر من 35 عام.

شريف إدريس يعلن اعتزاله العمل الفني

شريف إدريس نشر عبر حسابه على "انستجرام" رسالة أكد فيها اعتزاله التمثيل بسبب الحالة التي يعيشها الوسط الفني من ناحية الطريقة التي يتم من خلالها اختيار النجوم المشاركين في الأعمال الفنية، ووصف شريف إدريس ما يحدث بالمرحلة "العبثية" حسب وصفه، مشيرا أن توزيع الأدوار على النجوم بات في يد مجموعة معينة لذلك قرر الابتعاد.

فقال شريف إدريس: "بعد 35 سنة سعي وتعب وشقى في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد..وده قرار أخدته بعد ما الأمور وصلت في الوسط الفني لمرحله عبثية وصلت أني بقيت بشوف بعض الزملاء بيشحتو الشغل علني علشان يشتغلو لان الشغل بقي متقسم علي ناس معينه، فلو الأمور وصلت لكده ابعد أحسن".

وأضاف شريف إدريس: "وحتي لما بيجي شغل بيتفرض عليك توافق باقل الفلوس وتخرج من الشغل مديون..ومواقف مهينه زي أن شركة إنتاج تعرض عليك أجر هو قيمة ربع أجرك والسبب أن الميزانية مصروفة على الديكور، طب خلو الديكور يمثل هحكيلكم موقف حصل معايا من اسبوع".

شريف إدريس يطلب المساعدة في إيجاد فرصة عمل

شريف إدريس أكد أن قرار ابتعاده عن التمثيل جاء بعد شعوره بصعوبة قبوله الشروط التي يتم فرضها من أجل أن يشارك في أي عمل فني فقال: "اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور..كان هيجيلي جلطه بعد ما قفلت المكالمة ووافقت علشانأ انا محتاج اشتغل ومحتاج فلوس..وماقدرتش استوعب الفكره بصراحة أني بعد العمر ده مضطر ادفع علشان اشتغل فاتصلت واعتذرت، وده الحال حاليا أن الامور بقت في ايد كاستينج دايريكتور".

شريف إدريس طلب المساعدة بتوفير فرصة عمل له خارج مصر بعد وصوله لمرحلة اكتئاب، في وقت يحتاج فيه لتربية أطفاله الثلاثة فقال: "وصلت لمرحلة نفسية ومادية اني بقيت مش قادر اربيهم ولا اصرف عليهم وانا عندي تلات أطفال..وبقيت مديون لطوب الارض حقيقي لو حد عنده فرصة سفر ليا هاكون شاكر له جداً وهيكون جميل في رقبتي لحد ما اموت لأن حقيقي انا مش قادر اعيش".

شريف إدريس: "أنا مش محتاج طبطبه من حد"

اعتزال شريف إدريس جاء أيضا بعد تأكيده بأنه سعى للعمل في مجالات آخرى لكنه لم يستطع بسبب أنه حياته ودراسته بشكل كامل كانت تتركز في عالم الفن فقال: "حاولت اسعي في أي مجال تاني بس ماقدرتش وحقيقي لو اتعرض عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شئ همسح ابلكيشن فيسبوك من تليفوني لاني هنزل ابيع تليفوني اصلا..فانا هاكون متاح اونلاين لحد بالليل".

وأضاف: "لو حد عنده فرصة شغل وسفر ليا ومش معاه رقمي ياريت يجيبه من أي حد ملحوظة أنا مش محتاج طبطبه من حد أنا محتاج فرصة سفر وشغل تخليني أعيش ولادي حياه كريمة وبس شكرا ليكم محبتي للجميع".

معلومات عن الفنان شريف إدريس

شريف إدريس شارك خلال مسيرته الفنية التي بدأت في منتصف الثمانينات بأكثر من 70 عمل فني، وتحديدا أثناء فترة طفولته حيث شارك في بطولة فيلم " الاتحاد النسائي" مع الفنانة مديحة كامل والفنان أحمد مظهر، وشارك كذلك في بطولة مسلسل "رأفت الهجان" حيث قدم شخصية الطفل "طارق" مع الفنان محمود عبدالعزيز، كما شارك في بطولة مسلسل "أربيسك" مع الفنان صلاح السعدني" وقدم شخصية الطفل "أيمن حسن النعمان" وتعاون كذلك مع الفنان عادل إمام في مسرحية "بودي جارد"، وقدم أكثر من عمل خلال الفترة الماضية كان آخرها مسلسل "قصر النيل" مع الفنانة دينا الشربيني.

الصور من حساب شريف إدريس على "فيس بوك" و"انستجرام".