الممثل والكاتب والمخرج جورج خباز يكتب لـ"هي" قصيدة خاصة: "بلدي.. في حب الفن"
بلــــدي،
في حب الفن
بلدي.. مِن أوَّل ما خلِقت وفنّك بيحكيلي
عن ايّامك العزّ والإيّام البخيلة
فنّك ذكي بِلحن دافي
وصباح يشيّب ليلَك الغافي
وصوت الجبل بميتَك الصافي
يهدِر هدِر
يلوّن جمِر
يخبّــر عُمُر
لم فيروزك تغنّيلي
بلدي من اوّل ما خلِقِت وفنّك بيحكيلي
شمس الدّين من عندَك بتشرق
بمسـبحة، بركعة، بصلا، بترتيلي
وبركات من السما وهبة
تعبّي صبر بقلوبنا العليلة
الحجر،البشر،التراب،الشّجر
حتى المدافِن فيك بتعنيلي
ليلَك عنيد
نهارَك سعيد
وجناح مكسَّرة يطيِّرها خليلي
ومهما زعلت عالمعاصي عاصي
ومن السما منصور عالمِحنة الطويلة
وإذا عالقهِر شي ليلة نسيت صليلَك
من جبل زيتونَك إنتَ صليلي
